DALILI SABA (7) MUHIMU ZINAZOWEZA KUASHIRIA UGONJWA WA KISUKARI

 Watu wengi wanaweza kuwa na ugonjwa wa kisukari pasipo wao kutambua sababu ikiwa ni pamoja na kutofahamu dalili za awali za ugonjwa wa kisukari lakini pia dalili hizo huonekana zisizo na madhara kwao. Kutokana na kuongezeka kwa huduma za uchunguzi nyakati hizi, watu wamekuwa wakigundulika na ugonjwa huu hata kabla ya dalili, hii imesaidia kupungua kwa madhara yatokanayo na ugonjwa wa Kisukari ambao haudhibitiwi. Baadhi ya dalili zinazoweza kuashiria ugonjwa wa Kisukari ni pamoja na;

1. Kukojoa mara kwa mara

-Inapotokea hitilafu katika homoni ya Insulini kiasi cha kushindwa kufanya kazi vizuri hupelekea sukari nyingi katika damu kuliko kawaida. Hii hupelekea mwili kutoa sukari nje kwa njia ya mfumo wa mkojo. Ikumbukwe si kila anayekojoa mara kwa mara ana ugonjwa Kisukari.

2. Kupatwa na kiu sana

Kutoka na mwili kupoteza maji mengi mwili hasa kupitia mfumo wa mkojo, hii hupelekea mtu kuwa na uhitaji wa mara kwa mara wa kunjwa maji.

3. Kupatwa na njaa kali

Hitilafu katika homoni ya Insulini hupelekea mwili kukosa sukari katika seli zake kwa ajili ya kuendesha shughuli mbali mbali za mwili. Hali hii itamfanya mtu kuhisi njaa kali sana na kutaka kula mara kwa mara.

4. Kuchoka mara kwa mara

Hali ya kujisikia uchovu mara kwa mara hutoka na seli za mwili kukosa chakula (sukari) inavyotakiwa na hivyo kupelekea hali hiyo.

5. Kupungua kwa uzito wa mwili

Kutoka na hitilafu ya homoni ya Insulini mwilini kiasi kwamba sukari haifiki katika seli za mwili, hii hufanya mwili kutafuta mbadala wa virutubisho kama kutumia mafuta na hata protini katika misuli. Hatima yake ni uzito kupungua.

6. Kupungua kwa uwezo wa macho kuona

Sukari nyingi katika damu huathiri mishipa ya damu katika macho na hivyo mtu kuanza kuona kama giza au hali kama ya ukungu.

7. Kupata ganzi katika mikono na miguu

Mishipa ya damu pamoja na mishipa ya fahamu katika mikono na miguu huathiriwa na sukari nyingi mwilini na hivyo kusababisha hali ya ganzi maeneo hayo.

Magonjwa mengine tofauti na kisukari yanaweza kupelekea dalili tajwa hapo juu . Hivyo, ni muhimu kutambua kuwa dalili tu haitoshi kusema mtu ana ugonjwa wa Kisukari, ni vyema kufika katika kituo cha afya na kuonana na mtaalam kwa uchunguzi na vipimo zaidi kudhibitisha tatizo hili.